નૈયા ઝૂકાવી મેં તો

નૈયા ઝૂકાવી મેં તો જોજે ડૂબી જાય ના,

ઝાંખો ઝાંખો દીવો મારો જોજે રે બુઝાય ના...

સ્વારથનું સંગીત ચારે કોર બાજે,

કોઈ નથી કોઈનું આ જગમાં આજે,

તનનો તંબુરો જોજે બેસુરો થાય ના... ઝાંખો ૧

પાપ ને પુણ્યના ભેદ રે ભૂલાતા,

રાગ ને દ્વેષ આજે ઘરઘર ઘુંટાતા,

જોજે આ જીવતરમાં ઝેર પ્રસરાય ના... ઝાંખો ૨

શ્રદ્ધાના દીવડાને જલતો જ રાખજે,

નિશદીન સ્નેહ કેરુ તેલ તેમાં પૂરજે,

મનના મંદિરને જોજે અંધારું થાય ના... ઝાંખો ૩