કળજુગમાં જતિ સતી સંતાશે ને

ગંગાસતી અને પાનબાઈ

કળજુગમાં જતિ સતી

કળજુગમાં જતિ સતી સંતાશે ને

કરશે એકાંતમાં વાસ રે,

કુડા ને કપટી ગુરુ ને ચેલા

પરસ્પર નહીં વિશ્વાસ રે ... કળજુગમાં

ગુણી ગુરુ ને ચતુર ચેલો પણ

બેયમાં ચાલશે તાણાવાણ રે,

ગુરુના અવગુણ ગોતવા માંડશે ને

ગાદીના ચાલશે ઘમસાણ રે ... કળજુગમાં

ચેલકો બીજા ચેલા પર મોહશે ને

પોતે ગુરુજી થઈને બેસે રે,

ગુરુની દિક્ષા લઈ શિક્ષા ન માને

જ્ઞાન કે ગમ નહીં લેશ રે ... કળજુગમાં

ચેલો ચેલા કરી કંઠીઓ બાંધશે ને

બોધમાં કરશે બકવાદ રે,

પેટને પોષવા ભીખીને ખાશે ને

પુરુષાર્થમાં પરમાદ રે ... કળજુગમાં

ધનને હરવા છળ કરશે ને

નિતનવા ગોતશે લાગ રે,

આસન ઉથાપી કરશે ઉતારા ને

વિષયમાં એને અનુરાગ રે ... કળજુગમાં

વાદવિવાદ ને ધરમકરમમાં

ચૂકશે નહીં કરતા એ હાણ રે,

ગંગાસતી કહે એવાથી ચેતજો

કલજુગના જાણી પરમાણ રે ... કળજુગમાં

••• ✦ •••

શેર કરો

ડાઉનલોડ કરો

PDF

ઓડિયો / વિડીયો શોધો

People also search using Kaljugama Jati Sati Santashe Ne lyrics, lyrics, Kaljugama Jati Sati Santashe Ne gujarati bhajan lyrics, pdf download
ભક્તિમિત્ર.in • https://bhaktimitra.in