રાત રહે જાહરે

રાત રહે જાહરે, પાછલી ખટ ઘડી,

સાધુ પુરુષને સૂઈ ન રહેવું;

નિદ્રાને પરહરી સમરવા શ્રીહરિ,

એક તું એક તું એમ કહેવું.

જોગિયા હોય તેણે જોગ સંભાળવા,

ભોગિયા હોય તેને ભોગ તજવા;

વેદિયા હોય તેણે વેદ વિચારવા,

વૈષ્ણવ હોય તેણે કૃષ્ણ ભજવા.

સુકવિ હોય તેણે સદગ્રંથ બાંધવા,

દાતર હોય તેને દાન કરવું;

પતિવ્રતા નારીએ કંથને પૂછવું,

કંથ કહે તે તો ચિત્ત ધરવું.

આપણે આપણા ધર્મ સંભાળવા,

કર્મનો મર્મ લેવો વિચારી;

નરસૈંયા સ્વામીને, સ્નેહથી સમરતાં,

ફરી નવ અવતરે નર ને નારી.